北歐之旅（17 - 25 Nov 2015）Day 5

第五天朝早，我哋就到瑞典Stockholm。

落船後，第一個景點就係華莎戰船博物館。

其實裏面有好多嘢參觀㗎，不過我哋好快就睇完，行咗出去影下外圍。

跟著去咗市政廳，即係每年頒發諾貝爾奬同舉行宴會嘅地方。

其實當時好凍，我哋以為去到瑞典會暖啲。點知當時係零下嘅溫度，兼夾有海風吹埋嚟，勁凍。

千祈唔好比個太陽呃咗，一啲都唔暖和。

好喇，開始入內參觀。

好快就參觀完市政廳，咁又到lunch時間。

嚟瑞典梗係食佢最出名嘅肉丸啦，不過好有Ikea嘅感覺。

食完lunch，我哋又係唔join佢哋嘅自費活動，乜嘢露天博物館。

所以我哋又開始自由行四處走。

不過天氣實在太凍，我哋頂唔順，所以搵咗間cafe嘆啡，同order咗個open sandwich with shrimp。

唉，可惜天寒地凍，個open sandwich凍冰冰，仲凍。

哈哈，大家係咪唔見sandwich嘅包呢，咪就比啲蝦遮住囉。

但杯啡係ok嘅。

嘆完tea，再同團友會合，然後去舊城區market，嗰度都幾有特色㗎。

話說到咗集合時間去食晚飯，導遊唔見，車又唔見，人又未到齊，仲要企喺當風位，我哋堅凍。

後來有個團友好似leader咁走過嚟，問我哋齊人未，係咪好凍。我哋同其他團友就話應該未齊人，同埋導遊未到。佢就話跟佢行，我哋發現佢原來一早就知架車泊喺邊，佢老婆仲已經坐咗喺車裏面。

我估佢兩公婆可能喺舊城區，中途遇到導遊，又唔想繼續行，所以導遊話比佢哋聽架車泊喺邊，所以佢哋就一早上咗車等。可憐我哋同其他團友就白白喺個當風位等一輪，嗰時真係想講粗口。

當我哋坐好後，導遊就好怱忙咁衝上車，佢可能知道自己遲哂到，數人頭好hea，因為我哋坐最後，我見到前一排應該有對夫婦未上車，但導遊竟然叫開車。我立即叫停，再同導遊講仲有pair夫婦未上車。咁導遊就即落車，走番去原先集合嘅位搵對夫婦，好彩好快搵到。將心比己，自己企喺集合嘅位好凍㗎，啲人又唔見哂，可想而知嗰對夫婦好徬徨㗎。

呢件令我哋對導遊扣咗些少分㗎。

食完飯，我哋就返酒店，佢好似中環怡和大廈㗎，睇啲窗就知㗎喇。

酒店附近有間大型商場，不過八點好多舖頭就收㗎喇，但超市就開夜啲，我哋逛咗陣就返房訓。

聽日第六日嘅唯一行程，就係坐差不多六個鐘車程去挪威嘞，所以等於冇行程。