北歐之旅（17 - 25 Nov 2015）Day 1

北歐四國九天之旅係搭凌晨機，我哋喺11月16日夜晚10點鐘機場集合。

機場未有太多聖誕裝飾，不過有啲得意嘢，所以影下。

未到集合時間，我哋就去Pokka Cafe嘆咗個long dinner。

夠鐘上機

芬蘭航空啲餐都ok㗎。

終於到咗Helsinki，要等轉機去Ivalo入北極圈，所以喺Helsinki機場逛逛。

當然唔少得喺Starbucks消磨時間啦。

再上機喇。

話說呢程機好得意，佢會飛個幾鐘，停一個站，有乘客上落，先再飛去Ivalo，話因為慳成本。

但其實嘥咗時間，停嗰個站都差不多半個鐘，然後再起飛去Ivalo，只需10幾分鐘就降落嘞。

我始終唔明慳到幾多成本，增加到幾多收入呢。不過佢就好理智咁同我講，話停站嗰度，可能係偏遠而又交通唔方便嘅地方。

咁我再望一望flight information，飛行速度相等於900km/h，10幾分鐘到，當除4，差不多飛咗225公里，就算一架時速100公里嘅車，都要兩個幾鐘至到，但有風雪，車只可開5-60公里，咁就要3-4個鐘至到，計成本效益，乘客會揀搭飛機。

無聊計下數，但我係出嚟玩㗎，平時仲計唔夠咩，話鬼知佢啦，不過事實真係嘥咗我哋時間。

雲層上以為好好天，到降落就發現大雪茫茫。

第一件事梗係醫肚啦，不過冇影相，因為自助餐食物好普通。

但就影咗間shop啲公仔。

跟著再搭車去我哋住兩晚嘅地方，位於Saariselkä嘅glass igloo。

去到其實唔係好夜，大概下午4、5點度，但一入冬，呢個鐘數已入黑。

最辛苦係喺reception house分派咗鎖匙後，我哋就要用架雪撬，喺冰天雪地，摸黑推住luggages，行咗差不多10幾20分鐘，先至搵到呢兩晚住嘅igloo。

搵嘅時間長短，就視乎你嘅igloo所在地，我哋住得比較後，所以用嘅時間多啲。

最慘係佢同我都低估咗當地嘅天氣，原來得零下兼有風雪。不過可能行到個身有啲熱，如果唔係，應該會凍死。

幾經辛苦，終於去到我哋嘅igloo，房間頗細，廁所更細，並冇浴室。冲涼要行5-10分鐘去一個公共浴室喇，嗰度有埋桑拿嘅。但天寒地凍，而且冲涼地方係冇乜私隱，大家要肉帛相見。我同佢比較保守，嗰兩晚都係喺私人廁所內，作簡單清潔就算嘞。

提意一下大家，如果想住glass igloo，唔好揀呢度呢啲舊式嘅，有啲新式二人glass igloo有埋私人浴間嘅。不過住唔住glass igloo係個人選擇喇，除非你想晚晚清空下欣賞極光，但好似我哋咁黑仔，兩晚都黑蚊蚊，就嘥料，而且住glass igloo幾貴㗎，我哋呢種舊式嘅，都要2千幾蚊一晚。

欣賞下房裏面先，張床仲可以電動調校斜度，等你好舒服咁仰臥欣賞極光（如果有）。

門外影入去。

房內望出去，係咪黑過芝麻糊呢，唉！

喺房抖咗一陣，就行番去reception house嘅餐廳食晚飯，因為約咗6點半喺嗰度等，途中影下呢啲街燈先。

夜晚一個個glass igloo透啲光出嚟，其實幾靚㗎，不過真係好凍好凍，希望食咗嘢好啲啦。

終於到咗餐廳。

今晚食咗好「鞋」嘅雞胸，同唔好食嘅甜品。

最慘係咁簡單嘅食物，我哋食咗兩個幾鐘，佢哋真係整得好慢，可能佢哋好少接待30幾人嘅團啦。我哋唔理咁多，食完快快趣行返房（記住有段距離㗎），即刻清理身體，上床睡覺，成晚都落雪。

休息好，聽日玩husky同reindeer riding，正！