北歐之旅（17 - 25 Nov 2015）Day 3

第三日一朝早食完早餐，就坐車去聖誕老人村。

車程頗遠，所以有中途站。

去到Rovaniemi，聖誕老人村所在地，已經係中午時段。

咁我哋就食完晏，先至入村。

其實係semi buffet，前菜任食，跟一個main course。

因為我哋唔食reindeer，其實我唔係好明，啲人噚日先至同reindeer玩完，今日就嚟食佢，係咪好似有啲怪呢。不過就唔係同佢哋玩過，我哋報團時已經講明唔食鹿肉，所以餐廳就比salmon我哋食，真係好好味㗎，尤其是嗰啲potato mash加磨菇汁，yummy。

食完飯就入村喇，門口有棵聖誕樹好靚㗎。

嚟過都知呢條分隔缐係乜，就係顯示你進出北極圈嘅北緯66度分界喇。

左手面係未入北極圈，當你踏過去右手面，你就已經進入了北極圈嘞。

其實當時都係下午1、2點咋，好似黃昏咁。

我哋會逗留喺聖誕老人村兩個鐘度，所以要爭取時間遊覽下。

我哋有同聖誕老影相啦，買咗啲相，再買咗啲紀念品，仲寄咗聖誕咭，會喺聖誕節收。

不過聽導遊講，越來越少遊客嚟聖誕老人村喇，唔知仲可唔可以維持落去。

聽到之後，有啲傷感。希望大家睇完，會多啲選擇去聖誕老人村遊玩啦，嗰度啲人真係好nice㗎。

下午3、4點就入夜，其實夜景都好靚㗎。

差不多時候要走喇，因為要出機場，搭飛機去Helsinki，我哋嘅芬蘭北部之旅就此結束。

臨走前，再影多啲相先，bye bye喇聖誕老人村。

搭咗個幾鐘機，就去到Helsinki，食完晚飯，就返酒店，明顯冇Rovaniemi呢啲北部地區咁凍。

返到上房，我哋就徹底清潔下自己，因為頭兩晚喺玻璃屋，大家都係簡單清潔就算，終於可以享受一個熱水浴。哈，間房竟然有啲pop art畫作，影下佢先。

聽日第四日會有大半日喺Helsinki，到下午三點幾就會搭遊輪Silja去瑞典，呢架遊輪幾正㗎。