北歐之旅（17 - 25 Nov 2015）Day 7

第七天會喺Oslo stay半日，跟著晏啲又上遊輪去丹麥喇。

第一站就係去Vigeland Park，呢度有好多人生哲理嘅雕塑藝術品。

其實當時好凍，公園冇乜遊客，最多人數算係我哋。

好多藝術品講及愛情、家庭、年老同對社會嘅睇法，當然我哋呢啲對藝術識條「鐵」嘅人，係完全參透唔到，睇唔明，只可以領會到係一堆堆扭作一團嘅⋯⋯。

呢個係當地導遊，未到Oslo前喺香港Poly讀過書，佢好似仲怕凍過我哋。

好過瘾㗎，呢度有十二星座嘅雕刻，我嗰個唔講，大家都估到我個星座啦。

佢嗰個大家估唔估到..........係，冇錯，以大家咁高知識水平，一定估到係巨蟹啦。

行完公園，我哋就去維京船博物館。

呢班學生好得意㗎，我哋一入門口，猛咁同我哋講welcome，大家仲一齊影selfie。玩完一輪，佢哋就要乖乖哋坐聽講座。當地導遊話，原來挪威教育制度好活動化㗎，佢哋下午時間，學校要帶學生出去課外活動，唔會留喺課室內，仲要無論好天唔好天，落風雪都會出去㗎。香港教育官員學吓啦，吳局長成日唔知歐遊定交流，又唔見學到呢啲嘢，淨係攬住個TSA。

Oslo最後景點就係市政廳。

呢度就係開議會嘅地方，我哋都做咗一陣「議員」㗎。

遊完市政廳，就係自由時間，之後再集合一齊上遊輪。

咁我哋就四圍逛同影相。

行到攰攰哋，我哋就入咗Hard Rock Cafe嘆咖啡。

嘆完啡，再行多陣先。

夠鐘集合上遊輪。

今次坐DFDS去丹麥，船比上次細啲，商店及娛樂冇咁多，但餐飲ok㗎。

明天第八日就到丹麥，亦都係旅程最後一天，跟住搭夜機回港，返到香港就係第九天。