北歐之旅（17 - 25 Nov 2015）Day 2

第二朝早當然去reception house食早餐，跟住集合去玩啦。

因為要玩husky同reindeer riding，啲風吹埋嚟會好凍，要重裝備，打底衫褲梗係唔少得啦。

佢頂帽同手套，今次不容有失。

嗰度嘅工作人員好有心機㗎，寫哂整日嘅activity rundown，方便參與者double check下活動時間。

早餐啲三文魚好肥美㗎，加咗刁草同olive oil，好好味，不過冇影到相。

食飽早餐，未夠鐘出發，喺shop度影下啲紀念品先。

我哋被安排玩reindeer riding先，然後至玩husky riding，下面班團友玩完仲繼續合照。

呢個女原住民幾靚女㗎，所以未上鹿車前，我哋有跟佢合照。

咁當然有同鹿主Simon合照啦。

今次導遊Derek好醒目㗎，未出發前，主動幫我哋喺鹿車上影合照。

Derek真係幾好人㗎，所以今次除咗比指定導遊費，我哋仲比咗少少tips佢。

啲馴鹿好乖好聽話㗎，Simon一聲令下，放埋條紅繩，佢就開始行嘞。

開鹿車喇，其實好慢㗎咋，睇片啦。

玩完reindeer riding，我哋就去玩husky riding，會有六隻husky拉嘅。

一個就坐在雪橇裏面，另一個就負責企喺雪橇後控制。

咁當然係佢坐我企啦。但玩之前，有個教練會講解下點控制架雪橇嘅。

其實唔太難嘅，主要雙手要緊握扶手，好似搭巴士地鐵咁。腳下有兩個brakes，細嗰個用嚟減速嘅，當落斜或轉彎用，而大嗰個係用來完全剎停成架雪橇嘅。上斜就用腳向後踩下啲雪，增加動力，咁啲husky就會加把勁拉上去㗎嘞。一定要記住唔好爬頭，好易有意外。

玩完之後，發覺速度冇想像中咁快。但我批husky精力好旺盛，試過幾次想爬前面頭，我就踩過好多次細brake減速，其實前面嗰架真係開得好慢，可能佢哋係一路踏住個brake嚟行嘅，如果唔係條路好窄，我肯定爬咗頭。

Husky拉完雪橇後，坐哂喺度休息，有啲會喺雪地翻滾，聽講係想降溫。

佢哋真係好乖㗎。

就係呢隻係雪地翻滾咗好多次，佢可能真係好熱。

就係呢個駕駛者，開得超慢。

玩完後，又去番reception house食晏。

食完晏，下午係自由時間，叫做仲有日照（其實當時只不過係兩點幾三點昨），我哋就四週圍去影相。

唔知點解見到一間間呢啲玻璃屋，令我想起風之谷，哈哈。

呢間係我哋嘅房，我特登擺咗架雪橇喺出面。

好準時㗎，一到around四點就天黑喇。

好鍾意影呢啲街燈仔，佢投射喺雪度嘅光環好靚㗎。

差不多又夠鐘食晚飯，行到reception house附近，見到呢條佈滿LED燈嘅橋幾得意，所以影下佢。

晚餐食薯蓉免治牛肉，都ok㗎。

今次快咗好多，因為導遊同餐廳講，我哋食完飯仲有節目，就係黑夜馬車追踪極光，唔可以遲到㗎。

點知追踪極光，唯一貼題嘅係黑夜同馬車，除此之外，乜嘢都冇得睇。

帶住失望心情行返玻璃屋，但比我突然發現天邊出現一啲光芒，雖然雲層極厚，但似乎係極光。

唔理咁多，攞番腳架出去捕捉下先。

我部機係Canon 6D，用24-105恆圈4.0，要𨍭全手動mode，ISO唔駛推太高，大概800度，再高啲會有noise，镸曝光25-30秒度，呢啲setting全部參考外國forum。

不過subject to係咪天色好，如果唔係，好似我今次咁，話之你再pro嘅5D Mark III，或1Dx，完全冇用，因為雲層太厚，係冇可能影到極光嘅。

一句講哂，如果天朗氣清，就算用手機都影到極光。

嗰啲被雲層遮蓋，泛綠泛紫紅嘅光芒就係隱藏住嘅極光喇，不過雲層太厚，所以唔明顯。

極光其實係由太陽風暴，所產生嘅電子撞擊，遇上兩極大氣層嘅oxygen同nitrogen，而變成不同顏色光芒。常見嘅綠色就係遇上oxygen所產生出嚟㗎喇。好似細個做實驗，搵bunsen burner燒唔同物質，火焰會出唔同顏色咁囉。

冇計啦，為有影多幾幅自娛，哈哈。

我終於明白乜嘢叫做「這麽近，那麽遠」- 「我想伸手拉近點，竟觸不到那邊，就欠一點點，但這一點點，卻很遠」。唉，感性、感觸、感慨.......

哈，唔知點解，當時天氣好嚴寒㗎，而我喺出面差不多影咗成粒鐘，但唔係好覺得凍，可能想影到極光嘅心情，已經蓋過凍嘅環境啦。

影完一輪，返房訓，聽日去聖誕老人村。