東歐遊（10-20 Jun 2013) - 斯洛文尼亞

過咗克羅地亞嘅border，就嚟到旅程第三站，亦即係第三個國家 - 斯洛文尼亞。好似克羅地亞咁，都係前南斯拉夫分裂出嚟嘅國家，1991年獨立，04年加入歐盟，07年採用euro，都算快嘞，可想而知，Slovenia嘅經濟發展係好迅速。人口大概200零萬，信奉天主教，首都盧比珍娜（Ljubljana），好美的名字呀。

我哋一開始，又係city tour先，因為過關嘅阻滯，去到Ljubljana已經夜晚七點半有多，好彩歐洲夏天日照時間長，所以嗰天仲好光，不過市集就收哂。

咁啱佢哋有單車賽，所以影低佢。

第二日我哋就去咗Postojnska Jama Cave睇鐘乳石，聽d人講，中國大陸用好詭異嘅燈光嚟照住d鐘乳石，好核突嘅。呢度就唔同，佢地用d白、黃光嚟照住，natural好多。話說入面係唔比影相㗎，不過好多遊客都影，咁我呢d唔乖嘅遊客梗係照跟啦。其實我哋個English guide都體諒，所以佢都講話就算影相都唔好開閃燈，因為會kill d animals㗎，即係嗰d human fish。我梗聽話啦，因為部Canon 6D根本就冇內閃嘅，支恆圈4.0完全夠用。不過我哋後面嗰個女導賞員就好認真，猛禁講No photo! No photo!........好驚呀。

入洞要搭小火車，車速都幾快，同埋唔好企起身，睇下圖你就知嘞。

我哋出番嚟嗰陣，幫襯咗呢個靚女買花蜜。佢講解得好好，又係咁比我哋試味，d味道都好特別，有flower，forest，chestnut嘅味道，不過我又食唔出chestnut味喎。