西歐11天遊 - 意大利（5月26 - 6月5日 2015）

嚟到第五日，我哋由奧地利去到意大利嘅Venice，必到之地就係聖馬可島。

其實都嚟過四次，所以冇乜感覺，但一次Gondola都冇玩過。有啲人可能覺得好嘥，但又唔可以咁講。其實裏面都有好多地方影相，同店舖逛逛，仲喺今次買咗Triangel（哈哈，我哋比較out)。除咗Triangel，我哋入咗間專賣Murano玻璃嘅店舖，買咗兩隻獨一無二嘅杯，因為啲杯係全人手造，就算pattern好似一樣，但啲細緻位都唔一樣，兼且杯身嘅厚度都唔同。sales好有耐性講解啲產品㗎，最後仲幫我哋勁包裝好嗰兩隻杯。我夠胆講句，應該幾十樓掉落街都唔會爛，所以我哋都將兩隻杯寄倉，盡量減輕hand carry負擔。至於Gondola，我哋終有一天會試嘅，或者將來自由行先算啦。

嘆息橋，我應該影過好多次同好多幅，呢個位永遠都擠滿人，所以都幾難影二人照，為有盡量攝位。

今次聖馬可廣場唔太多人，行得都幾舒服。

喺裏面食完飯就走喇，搭船之際，影番轉頭，希望有一日再重臨啦，ciao！

離開Venice，下一站就係Milan，又係一個重遊之地。歐洲有一個特別之處，就係你隔好多年後再去，啲地方都冇乜點變，尤其是啲landmark，証明人哋保留文物嘅意識好強。

如果大家去過Milan都知下面Da Vinci像，只要穿過Galleria Vittorio Emanuele II（艾曼妞拱廊）就見到㗎喇。

當然嚟得Milan，就不能錯過多莫奧大教堂（Duomo di Milano)，佢由1386年起到1965年完工，比聖家族大教堂起得仲耐，如果聖家族可以2026年完工嘅話。佢做過翻新，所以比以前白淨好多。其實Duomo任何角度都咁靚，當然影相最佳位置，就係佢嘅正前方。

因為有成1個半鐘嘅自由時間，行得攰咗，就喺Gucci cafe坐低飲嘢。最好笑係，意大利waiter以為我哋係日本人。因為埋單時，佢同我哋講arigatou，不過我哋澄清係from Hong Kong先啱，哈哈。

到咁上下就到集合返酒店嘅時間，啱啱有個街頭表演者吹奏緊音樂。我哋正在等侯時，都覺得係一種享受。