西葡之旅 (21-30 Jun 2014) - Day 4

第4日，我哋就由Malaga去Granada (摩爾人以前統治過嘅地方，喺中古時代，猶太人控制過呢度嘅經濟命脈，所以又叫做猶太城）。

到Granada嘅目的，就係要去Alhambra（阿爾罕布拉宮），呢個被譽為最美麗嘅摩爾式建築物。入去有個local guide叫做Elsie，不過佢唔係好識英文，全程係由導遊講解，Elsie嘅出現，純粹係西班牙要protect本地人嘅就業機會，其實個個國家都係咁。

不過同佢一齊行個陣時，佢都盡量用英文交談。我哋啱啱行過一棵樹下，佢仲同我講，啲樹葉可以用嚟沖茶，鎮定神經。死嘞，唔通佢從我外表，都睇得出我係躁底嘅，哈哈。

其實摩爾嘅刁花建築真係幾靚㗎。

嘩，呢啲係咪叫做鬼斧神功呀！

呢個就係Elsie，我覺得佢好似吉卜賽人。

今日，我哋仲有一個行程，就係去Cordoba（哥多華），一個喺7世紀被摩爾人統治過嘅城市，全盛時期，興建咗3000間回教寺。

呢個教堂Cathedral-Mosque of Cordoba，前身係清真寺。其實係摩爾人統治時期，將當時嘅教堂改建成清真寺。但當基督徒奪回哥多華時，再將淸真寺，改回做教堂，真係鋒迥路轉，風水輪流轉呀。但一間溶入咗清真寺特色嘅教堂，世界上唔係好多地方有㗎。

嗰日落雨，真係掃興，好彩大部份時間係喺教堂裏面。

入面啲柱係呢間教堂嘅特色，唔知係咪以前清真寺嘅建築嚟，不過裏面真係好大好靚。

呢啲係福音嚟，應該係手本，好矜貴呀。

出番嚟，再周圍影吓相，最衰天氣差，如果唔係，啲相再靚啲。