西葡之旅 (21-30 Jun 2014) - Day 3

第3日就係去Gibraltar （直布羅陀），一個曾經係西班牙嘅地方，但1704年戰後，割讓咗比英國。西班牙本想攞番主權（好似香港咁），但當地分別喺1967及2002年公投反對，所以到目前為止，Gibraltar仍然屬於英國土地（點解英國當年冇咁樣對香港)。

所以一去到Gibraltar，會發現好多英式嘅嘢㗎。其實由西班牙過境去Gibraltar好簡陋㗎，大家就咁遞高本䕶照，行過條通道，個工作人員根本冇認真睇過本䕶照，亦都唔蓋印。一入境行出街，就會見到呢個英式電話亭㗎喇。

跟住我哋就分兩批人，坐上一架van仔，車上有個local guide，佢會一路揸車，一路講解周圍嘅景物，直至上到山上Punta Grande de Europa嘞。

呢個就係山上嘅清真寺（Mosque of Two Holy Custodians），因為西班牙以前好受摩爾人嘅影響，而佢哋係信奉回教，所以仲遺留好多回教嘅建築物㗎。

Trinity Lighthouse

喺呢度望出去，對面就係北非，右手面就西班牙。

跟住我哋就去山上嘅鐘乳洞，超細，一陣就行完。

出番鐘乳洞，我哋喺山上望番落去，欣賞下個城市先。

仲有最重要就係遠望機場跑道。

大家一定覺得奇怪，跑道有乜好影呢。哈，因為Gibraltar嘅機場跑道，係被喻為世界最危險嘅跑道，因為佢係同其他車輛一齊使用。只要有飛機升降，就會攔住啲汽車，唔比佢哋通過。所以佢哋嘅交通指示要求好高㗎。

拜拜喇，我哋過番西班牙食晏。

食完晏，我哋就去白色山城 - Mijas。

大家可以選擇坐馬車或驢車遊覽山城嘅，不過梗係馬車型啲啦。

老實講，我覺得幾似赤柱街道㗎，不過嗰度就闊落啲。

嗱，呢個就係西班牙最細嘅鬥牛場嘞，導遊講㗎。

係咪幾似赤柱呀。

行咗好耐，差不多到集合時間，我哋就行番落山。經過一間雪榚店，店𥚃個女仔好殷勤咁叫我哋試食，佢仲估我哋鍾意乜嘢口味，mix咗分別兩種口味比佢同我試，其實都幾好味㗎。

我問佢食唔食，咁佢又話唔食，最後我哋買咗支水就算嘞。本來我哋想走㗎喇，點知個女仔問我哋有冇興趣參觀佢哋嘅chocolate factory，咁我哋見未夠鐘，就跟佢去睇下啦。佢就講解咗啲朱古力係點製成，全程都笑容滿面，同埋佢啲英文好流利㗎。

到最後我哋真係要走嘞，就同佢ciao，佢好開心咁送番我哋出去。其實唔係幫襯佢好多嘢，但佢對我哋真係好nice，好impressive，佢仲幾靚女添。