西葡之旅 (21-30 Jun 2014) - Day 2

第2日一朝早，我哋仲喺Lisbon，未去Altentejo Vineyard（阿蘭多葡萄酒莊）wine tasting，先去番Black Horse Square，因為噚日唔夠時間去。

逗留咗一陣，影咗啲相，叫做到此一遊啦，跟團係咁㗎喇。

好快就到咗Altentejo Vineyard，睇番Apple map相嘅定位，呢度應該係屬於Estremoz嘅地方嚟。莊園好靚，景色怡人，簡直係地靈人傑。

成個山頭都種滿葡萄，有啲已經收割咗，供釀酒用。

呢個就係莊主Barbara，佢正在講解緊葡萄園嘅運作，一開始佢就叫我哋be happy、have fun，好啱聽。其實佢好nice同埋笑容滿面㗎，對我哋嘅到來，佢表現得好開心。

呢部機器係用嚟去除葡萄啲莖嘅。

而家釀酒，通常用呢啲鋼造嘅容器。但我始終覺得木造嘅容器，釀成嘅酒好啲，同埋有陣木香味。

終於見到最classic嘅木桶容器喇，好正呀。

其實嗰度嘅花卉生長得好靚，可能同地理環境氣候有關啦。

Barbara叫我哋試酒，包括有紅酒同白酒，仲有啲小食供應。好多團友就品嚐啲紅酒同白酒，食Parma ham，我同佢就好享受冰凍嘅水，同馬介休薯波。哈哈，其實各適其適啦。

冇幾耐，我哋就喺莊園食晏嘞。

哈哈，大地在我腳下。

臨走時，影番一幅全景比大家睇啦。

跟住就要離閞葡萄莊，亦都代表我哋葡萄牙嘅行程完結嘞。

下一個行程，就係去西班牙，會到Seville先。第一站係西班牙廣場（Plaza de España）嘞，嗰度好鬼多人㗎。

其實呢度逗留咗好短時間，因為要趕行程，又在影幅全景圖比大家睇啦。

然後，我哋要好快速咁去埋Seville大教堂，因為要趕及7點鐘前去睇Flamemgo show兼晚餐。

我哋就係喺呢度睇show同晚餐，其實成間餐廳差唔多比我哋成團人包哂咁滯。因為嗰日係星期日，有鬥牛表演，大部分西班牙人，去哂隔離嘅鬥牛場睇表演。其實呢個團算係咁，因為包咗呢個show同晚餐。如果唔係，自費活動咁去，要成€60一個人㗎。

我哋覺得呢場個半鐘嘅show好精彩，啲dancers又唱又跳好落力，個餐都ok啦。

比你哋睇吓video啦，佢哋真係唱得跳得好精彩㗎。

食物賣相都幾好㗎，味道仲幾得添，呢個係前菜長通粉，好好味㗎。

主菜係鷄腿，好嫩好多汁㗎。

呢個甜品唔係好得，因為太甜。

食完飯，就行番出去影吓相，當其時差唔多夜晚9點㗎喇，仲幾曬。

呢度就係鬥牛場，咪睇佢靜英英，皆因啲人入哂場咋。

今日行程完嘞，大家就番酒店，期待第3日嘅行程。