西葡之旅 (21-30 Jun 2014) - Day 4

第4日，我哋就由Malaga去Granada (摩爾人以前統治過嘅地方，喺中古時代，猶太人控制過呢度嘅經濟命脈，所以又叫做猶太城）。

到Granada嘅目的，就係要去Alhambra（阿爾罕布拉宮），呢個被譽為最美麗嘅摩爾式建築物。入去有個local guide叫做Elsie，不過佢唔係好識英文，全程係由導遊講解，Elsie嘅出現，純粹係西班牙要protect本地人嘅就業機會，其實個個國家都係咁。

不過同佢一齊行個陣時，佢都盡量用英文交談。我哋啱啱行過一棵樹下，佢仲同我講，啲樹葉可以用嚟沖茶，鎮定神經。死嘞，唔通佢從我外表，都睇得出我係躁底嘅，哈哈。

西葡之旅 (21-30 Jun 2014) - Day 3

第3日就係去Gibraltar （直布羅陀），一個曾經係西班牙嘅地方，但1704年戰後，割讓咗比英國。西班牙本想攞番主權（好似香港咁），但當地分別喺1967及2002年公投反對，所以到目前為止，Gibraltar仍然屬於英國土地（點解英國當年冇咁樣對香港)。

所以一去到Gibraltar，會發現好多英式嘅嘢㗎。其實由西班牙過境去Gibraltar好簡陋㗎，大家就咁遞高本䕶照，行過條通道，個工作人員根本冇認真睇過本䕶照，亦都唔蓋印。一入境行出街，就會見到呢個英式電話亭㗎喇。

西葡之旅 (21-30 Jun 2014) - Day 2

第2日一朝早，我哋仲喺Lisbon，未去Altentejo Vineyard（阿蘭多葡萄酒莊）wine tasting，先去番Black Horse Square，因為噚日唔夠時間去。

西葡之旅 (21-30 Jun 2014) - Day 1

好喇，終於忙完一輪，可以開始寫我嘅西葡遊記，比預期早咗。

今次個團都ok㗎，不過去程有頗多阻滯。我哋搭法航，經巴黎去葡萄牙，但香港飛巴黎時，班機delay咗差唔多兩個鐘，令我哋爭啲趕唔到班connecting flight。到咗巴黎時，法航工作人員一路舉牌，一路引令我哋一行31人（連埋領隊）過法國immigration，我哋就好似玩Amazing Race咁跑。最後有驚冇險上到機，坐我隔離係一位外藉女仔，過immigration時，佢都企埋同我哋團友一齊㗎。不過佢好似唔係幾舒服，咁我就慰問下佢，順便傾計。佢原來係葡萄牙人，不過就住喺澳門同做嘢，今次番葡萄牙渡假。佢問我會逗留幾耐，我就話兩日咋，因為join團，如果自由行就去多啲地方。佢覺得淨係兩日好可惜，咁我就話我哋仲會去西班牙好多地方，例如Seville。佢就話佢有間屋好近Seville，揸20分鐘車就到，仲話嗰度好靚㗎。最後落機，我就祝佢有個愉快週末啦。

當到咗葡萄牙，先發現有部分行李，仍然喺巴黎嗰邊，連導遊都有份，令我哋對法航印象大打折扣。最慘係佢嘅行李喼都滯留咗喺巴黎，所以佢好唔開心。最後幾經波折，機場答應我哋，安排將啲行李喺夜晚前運番酒店，咁我哋就開始葡萄牙嘅行程，梗係食晏先啦。

西葡之旅 (21-30 Jun 2014) - 預覽篇

已經番咗嚟嘞，星期一晚機，好攰，曬黑咗，今曰請多一日假，聽日先番工。

但一番工會好忙，未必即刻寫到遊記，希望7月尾前，可以開始寫。

今次啲團友大致ok㗎，仲識咗p同m一對夫婦。佢哋好好人㗎，大家互相幫對方影合照。因為我哋冇去到Casa Mila影相，p將嗰度啲相whatsapp咗比我。在此，我再一次多謝p嘅幫忙，many thanks。

好啦，比一個預覧地圖大家睇住先，到時再詳述景點。